بحبك يا أمى

بحبك يا أمى
ولكنى قبل ما أقولك بحبك ..
حقولك مدين لك بألف اعتذار ..
حقولها لأنى تعبتك صحيح ..
لأنى في حياتى مكنتش مريح ..
وصابرة عليا وياما صبرتى ..
وشفتى وشايفة معايا المرار
مسمحانى عرفك..
ولكن سبينى أقول إعتذارى بكل المعانى
لأنى بذنبى تجاهك بعانى ..
لإمتى تضحى وأفضل أنانى !!
دا ذنبى ما بينى وبينك جدار
ودايما مساوية مبينى واخويا ..
ولا حد منا من التانى غار
ويوم عيد ميلادك .. تجيبى هدية ..
تجيبيها إنتى .. وتديها ليه ..
وكنت أما أزعل .. تنسينى همى ..
وبعد أما أنام .. تنامى يا أمى ..
وكنت أما أتعب .. تخليكى قربى ..
بطول الليالى وطول النهار.
وكنت أما اسافر في فسحة وأغيب
حنينها يشعلل فى قلبها لهيب ..
وقلقانه دايما وعايشة في نار.
ويوم إمتحانى .. كأنه إمتحانها ..
بتسهر معايا .. وتصحى معايا ..
ولما أصلى .. تجيب الفطار.
وعارفين في ماما بيعجبنى إيه؟
بيعجبنى فيها بساطة حياتها ..
بساطة كلامها ..
بيعجبنى فيها حضارة "خديجة" ..
و"مريم" و"هاجر" ..
طهارة مقامها ..
بيعجبنى فيها زهور الوقار.
بيعجبنى كونها مطاوعة لأبويا
وكونها تساعده في صنع القرار.
أنا باختصار ..
بحبك يا أمى